Mbi KEDP-në

Si rezultat i dialogut midis CIDA-së dhe Protektoratit të KB-së, është marrë miratimi i Ministrit për të financuar një projekt arsimor në Kosovë, dhe kështu në vitin 2001 është themeluar Projekti për Aftësimin e Mësimdhënësve Kosovarë (KEDP), si komponentë e parë e asaj që do të bëhej EDP.

Gjatë tri viteve të para të implementimit, KEDP ka arritur progres të konsiderueshëm në disa fusha të veprimit - duke përfshirë zhvillimin e kapaciteteve për përpilimin e politikave për aftësimin e mësimdhënësve në studimet themelore dhe aftësimin e mësimdhënësve pa shkëputje nga puna; fillimin e aftësimit profesional të mësimdhënësve dhe administruesve arsimorë duke zbatuar modelin e trajnimit të trajnuesve dhe duke përfshirë në trajnime më se 4,000 mësimdhënës, në mesin e të cilëve edhe pjesëtarë të grupeve të ndryshme etnike; themelimin e Fakultetin e Edukimit në Universitetin e Prishtinës - një nga vetëm dy fakultete të tilla në Ballkan - në të cilin programet për mësimdhënësit e nivelit parashkollor, fillor dhe të mesëm të ulët janë hapur në tri gjuhë; dhe integrimin e zhvillimit social si komponentë e ndryshimeve arsimore, përfshirë barazinë gjinore, pjesëmarrjen e minoriteteve dhe pjesëmarrjen e të rinjëve. Në vitin 2003, CIDA ka miratuar vazhdimin tre-vjeçar të KEDP-së për të vazhduar me programe deri në vitin 2007.

Konteksti i Reformës Arsimore

Konteksti për aftësimin e mësimdhënësve ka ndryshuar në masë të konsiderueshme që nga fillimi i veprimtarisë së KEDP-së në vitin 2001 - duke përfshirë disa ndryshime kryesore të cilat janë rezultat i punës së KEDP-së. Pas administrimit të përkohshëm të sektorit të arsimit nëpërmjet UNMIK-ut, në vitin 2002 u themelua Ministria e Arsimit, Shkencës dhe Teknologjisë (MASHT). MASHT-i, si institucion i ri, në fillim ka hasur në vështirësi të shumta. Me mbështetjen e KEDP-së, Ministria ka zhvilluar kapacitete solide për menaxhimin dhe administrimin e sistemit arsimor, dhe ka treguar përkushtim të madh ndaj zhvillimit profesional.

Me themelimin zyrtar të Fakultetit të Edukimit në Universitetin e Prishtinës, të cilin e ka mbështetur KEDP, përgatitja e mësimdhënsve para shërbimit në Kosovë (d.t.th. përgatitja e mësimdhënësve të rinj) poashtu ka kaluar në një model i cili është në përputhshmëri me standardet evropiane.

Programet e KEDP-së

Komponentet kryesore të KEDP-së janë:

1. Zhvillimi i ambientit aftësues për mësimdhënësit Kosovarë. Kjo përfshin një shumëllojshmëri të iniciativave dhe mbështetjes intenzive, siç janë:

• Programi Zhvillimor për Udëheqjen e Lartë (PZHUL) - një kurs i përgjithshëm për udhëheqësit e nivelit të lartë dhe të mesëm të Ministrisë së Arsimit, Shkencës dhe Teknologjisë (MASHT) dhe të institucioneve tjera arsimore në Kosovë.
• Mbështetja e MASHT-it në zhvillimin dhe implementimin e qasjes sistemike në akreditimin e trajnimit pa shkëputje nga puna për mësimdhënësit.
• Mbështetja e MASHT-it në marrjen e përgjegjësive për koordinimin e donatorëve.
• Themelimi i Këshillit për Shqyrtimin e Aftësimit të Mësimdhënësve (KSHAM), një organ i cili e këshillon Ministrinë e Arsimit, zhvillon dhe propozon politika dhe rregullore lidhur me standardet në përgatitjen e mësimdhënësve dhe praktikat arsimore.

2. Trajnimi për mësimdhënës dhe edukatorë të tjerë, të cilët aktualisht punojnë në shkolla. Komponentet kryesore në këtë fushë janë:

• Trajnimi i mësimdhënësve nga të gjitha komunitetet etnike në "Mësimdhënien me Nxënësin në Qendër " (MNQ), një program i cili ofron bazat e qasjes së orientuar në rezultate dhe në nxënie aktive.
• Trajnim në shkathtësitë e udhëheqjes për administruesit e shkollave.
• Trajnimi i trajnuesve vendorë të MNQ-së, udhëheqjes, dhe barazisë gjinore në arsim, dhe mbështetje dhe këshillim i vazhdueshëm i këtyre trajnuesve për të mbajtur kurset dhe për të përmirësuar vazhdimisht programet e trajnimit.
• Mbështetja e themelimit të një rrjeti të gjerë të administruesve të shkollave në nivel të Kosovës.
• Mbështetja e zhvillimit të botimit të materialeve për trajnim të përgatitura nga vendorët.

3. Zhvillimi i Fakultetit të Edukimit për ta mbështetur përgatitjen e mësimdhënësve, përfshirë:

• Mbështetjen e themelimit të Fakultetit të ri të Edukimit, i cili e zëvendëson strukturën e mëparshme të fragmentuar të studimeve themelore për mësimdhënës.
• Mbështetjen e zhvillimit të programeve dhe kurseve, të menaxhimit, të zhvillimit profesional të stafit; dhe
• Mbështetjen e nxënies së studentëve dhe zhvillimin dhe implementimin e programit të mësimit praktik dhe mbikëqyrjes së studentëve të rinj.